Meta korporasiýasy Facebook-yň mahabat ulgamyndaky gowşaklygy ýüze çykaran garaşsyz kiberhowpsuzlyk hünärmeni Ben Sadegipura 100 müň dollar töledi.
Ben Sadegipur Facebook-yň mahabat ulgamlarynyň barlagdan geçirilýän wagty kompaniýanyň içki serwerlerine doly aralaşmaga mümkinçilik berýän gowşaklygy ýüze çykardy diýip, TechCrunch habar berýär.
Sadegipur mahabat ulgamynyň barlag wagtynda Facebook-yň içki serwerlerinde buýruklary bermäge we ýerine ýetirtmäge mümkinçilik berýän gowşaklygy tapdy we olara doly gözegçiligi öz eline almagy başardy.
Bu gowşaklyk Facebook-yň mahabat ulgamyny dolandyrmak üçin ulanýan Chrome brauzeriniň köne wersiýasynyň düzedilmedik kemçiligi bilen baglanyşyklydy. Sadegipur şol kemçilik arkaly içki serwerlere girip, administrator hukuklaryny gazanmagy başardy.
Hünärmen bu mesele barada Meta korporasiýasyny habarly etdi.
"Men bu gowşaklygyň infrastrukturaňyzyň içinde ýerleşýändigi sebäpli düýpli meseledigini we düzedilmelidigini pikir etdim" diýip, Sadegipur öz hatynda aýtdy. Meta bu kemçiligi bir sagadyň içinde tiz düzetdi.
Korporasiýa meseläniň düzedilendigini tassyklady, ýöne goşmaça teswir bermekden ýüz öwürdi.
Sadegipur beýleki kompaniýalaryň mahabat platformalaryny hem barlap, şuňa meňzeş gowşaklyklaryň bardygyny belläp geçdi.
