Las-Wegasdaky CES 2025 sergisinde Samsung rekord derejede iň ýokary ýagtylygy bilen tapawutlanýan MicroLED ekranly dünýäde ilkinji akylly sagady görkezdi.
Öň displeýiň şeýle görnüşi täjirçilik taýdan elýeterli akylly sagatlarda ulanylmandy. Sagatlaryň ekranynyň iň ýokary ýagtylygy 4000 nit bolup, bu Galaxy Watch Ultra-nyň OLED displeýiniň ýagtylygyndan 33% ýokarydyr.
MicroLED ekranynyň diagonaly 2,1 dýuýma, durulygy bolsa 418 x 540 piksele barabar. Pikselleriň dykyzlygy bolsa 326 ppi. Deňeşdirmek üçin, Galaxy Watch Ultra-nyň displeýiniň piksel dykyzlygy 327 ppi deň, ýöne öň MicroLED ekranlarynyň piksel dykyzlygy OLED bilen deňeşdirilende has pesdi. Samsung-a kemçiligi düzetmek başartdy we bu tehnologiýany ösdürmek üçin möhüm ädim boldy.
MicroLED ekranlary birnäçe artykmaçlyga eýe: olar has çydamly, energiýa taýdan netijeli, seslenmede has tiz we adatdan daşary temperaturalarda ulanylyp bilner. OLED ýaly, olar hem çäksiz kontrastlygy, arassa gara reňki we giň syn ediş burçuny üpjün edýär.
Microled-info-nyň maglumatlaryna görä, Samsung eýýäm täze displeýli Galaxy Watch-y täjirçilik taýdan çykarmagyň üstünde işleýär. Bu gurluşlar 2025-nji ýylda satuwa çykyp biler.
Belläp geçsek, Garmin kompaniýasy hem şeýle tehnologiýany Fenix 8 seriýasyna girizmegiň üstünde işleýär, Apple bolsa ony öz Apple Watch Ultra sagatlary üçin öwrenýär, ýöne onuň satuwy 2026-njy ýyla süýşürilip bilner.
