Toyota Motor 2025-nji ýylyň güýzünde ilkinji ýüz ýaşaýjynyň Fudzi dagynyň etegindäki Woven City şäherine ornaşyp başlajakdygyny mälim etdi, Dezeen habar berýär.
“Şu ýyl ilkinji ýaşaýjylary göçürip başlarys, biz kem-kemden Woven City-ni janlandyrarys. Biz täze tehnologiýalary synagdan geçirmek we işläp taýýarlamak prosesini tizleşdirmäge çalyşýarys” – diýip, Toyota-nyň başlygy Akio Toýoda Las-Wegasdaky CES 2025 sergisinde aýtdy.
Başlangyç tapgyrda innowasion şäheriň ilat sanyny, esasan, kompaniýanyň işgärleriniň we olaryň maşgalalarynyň hasabyna 2000 adama ýetirmek meýilleşdirilýär.
“Janly barlaghana” hökmünde döredilen şäher azyndan iki ýyl giň köpçülik üçin ýapyk bolar. Toýodanyň aýtmagyna görä, taslama ýitgili, ýöne geljekki tehnologiýalar üçin möhüm bolup biler.
“Woven City Toyota-a girdeji getirermi? Belki, ýok. Ýöne global kompaniýa hökmünde biz umumy geljegimize maýa goýmagy borç hasaplaýarys” – diýip, Toýoda belledi.
Woven City kompaniýanyň emeli aňyň, robototehnikanyň we durnukly infrastrukturanyň ösüşine gönükdirilen uly başlangyjynyň bir bölegidir. Bu başlangyjyň çäklerinde kompaniýa Arene atly täze programma platformasynyň üstünde işleýär. Ol awtomobilleri döretmek prosesini çaltlaşdyrmaga we önümçilik çykdajylaryny azaltmaga mümkinçilik berer. Kompaniýa şu ýyl bu ulgamy ornaşdyryp, ony 2026-njy ýyldan başlap indiki nesil elektromobilleriniň esasy komponentine öwürmegi meýilleşdirýär.
