Ethereum-yň esaslandyryjylarynyň biri Witalik Buterin haýyr-sahawat maksatlary bilen köp mukdarda mem tokenlerden dynmagyny dowam etdirýär. Kriptomilliarder, takmynan, 984 000 dollar mukdarda memkoinleriň uly tapgyryny satdy we alnan serişdeleri Kanro biotehnologiki haýyr-sahawat guramasyna berdi diýip, Investing neşiri habar berýär.
Bu Buteriniň ilkinji haýyr-yhsany däl. Geçen ýylyň oktýabr aýynda ol tas 884 000 dollar mukdarda memkoin satyp, pullary howa-damja ýoly arkaly geçýän kesellere garşy göreş tehnologiýalaryny işläp taýýarlaýan kompaniýa berdi. Tomsuň ahyrynda Effective Altruism haýwanlary goramak gaznasyna kömek etmek üçin ýüzlerçe müň dollarlyk memkoin satdy.
Işewür 28 dürli token satdy, olaryň arasynda 500 000 DINU (13 208 dollar), 50,48 mlrd ESTEE (takmynan, 116 306 dollar), 92,000 DOGE (35 233 dollar), 80,47 mlrd JSHIBA (21 466 dollar) we 698 000 OMIKAMI (27 895 dollar) bar. Şeýle-de, Buterin FREE, DOBE, PLUTO we MONKEYS memkoinlerini satdy.
Memkoinleriň şeýle köpçülikleýin satuwy olaryň bazardaky bahasyna täsir etdi we gysga wagtlaýyn üýtgemelere getirdi. Mysal üçin, DINU we JSHIBA üçin bahalar 30%-den gowrak peseldi.
Buterin kriptopudakda sosial jogapkärçiligiň möhümdigini ençeme gezek nygtady. Ol kriptowalýutalar garyplyk, açlyk we kesel ýaly global meseleleri çözmekde güýçli gural bolup biler diýip hasaplaýar.
