Fransiýanyň milli ýygyndysynyň baş tälimçisi Didýe Deşam 2026-njy ýylyň dünýä çempionatyndan soň wezipeden gitjekdigini mälim etdi. Bu barada hünärmen TFI teleýaýlymyna beren interwýusynda aýtdy.
“Men 2012-nji ýyldan bäri milli ýygyndyda, şertnamam 2026-njy ýyla, indiki dünýä çempionatyna çenli. Şunuň bilen hemme zat gutarar, sebäbi haçan hem bolsa bu bolmaly. Meniň kellämde ähli zat aýdyň” – diýip, 56 ýaşly tälimçi belledi.
Deşam milli topara 2012-nji ýyldan bäri ýolbaşçylyk edýär, ol bu wezipäni Loran Blan işden gidenden soň eýeledi.
Deşam bilen Fransiýa 2018-nji ýylda dünýä çempionatyny utdy, 2022-nji ýylda dünýä çempionatynyň kümüş baýragynyň eýesi, UEFA-nyň Millerler ligasynyň ýeňijisi (2020/2021 möwsümi), şeýle-de Ýewropa çempionatynyň kümüş we bürünç baýraklarynyň eýesi boldy (degişlilikde, 2016-njy we 2024-nji ýyllarda). Milli ýygynda gelmezden ozal “Monakoda”, “Ýuwentusda” we “Marselde” tälimçi boldy.
Futbolçy hökmünde Deşam Fransiýanyň milli ýygyndysynyň düzüminde dünýä (1998) we Ýewropa (2000) çempiony boldy.
Indiki dünýä çempionaty 2026-njy ýylyň 11-nji iýunyndan 19-njy iýuly aralygynda ABŞ-da, Kanadada we Meksikada geçiriler. Ýaryşa ilkinji gezek 48 ýygyndy gatnaşar, final “Metlaýf-stediumda” (Nýu-Jersi ştaty) geçiriler.
