Prezident saýlawlarynda ýeňiş gazanandan soň Donald Tramp öz kasam kabul ediş dabarasy üçin 200 million dollardan gowrak haýyr-yhsan toplady diýip, New York Times ýazýar.
Şol bir wagtyň özünde gazet çeşmelere salgylanyp, Trampyň kasam kabul ediş dabarasy bilen meşgullanýan diňe bir komitetiň donorlardan azyndan 150 mln dollar ýygnandygyny we bu mukdaryň 20-nji ýanwardaky çärä çenli ýene artyp biljekdigini belleýär.
Deňeşdirmek üçin, öňki kasam kabul ediş dabarasy üçin Tramp 107 mln dollar ýygnapdy.
Uly pul mukdarlary Pfizer, OpenAI, Amazon, Meta, Microsoft ýaly kompaniýalaryň we kriptowalýuta firmalarynyň ýolbaşçylaryndan geldi. Tramp olaryň köpüsine amatly iş şertlerini wada berdi.
“Bu donorlaryň ikinji prezidentlik möhletiniň öňüsyrasynda Trampyň gowy garaýşyny gazanmak üçin edýän tagallalaryny görkezýär” – diýip, NYT ýazýar.
Inaugurasion komitetler şahsy adamlardan we korporasiýalardan çäksiz goşantlary kabul edip bilýär, ýöne daşary ýurtly raýatlardan däl. Uly korporasiýalar eýýäm köpden bäri täze administrasiýa bilen işleşmäge we geljekki Prezidentiň partiýasyna garamazdan, häkimiýetiň demokratik geçişini goldamaga taýýardyklaryny görkezmek üçin inaugurasion gaznalara serişde bagyş edýär.
Belläp geçsek, ABŞ-da ýakynda geçiriljek kasam kabul ediş dabarasy 30-njy dekabrda 100 ýaşynda aradan çykan ýurduň öňki Prezidenti Jimmi Karteriň hatyrasyna ilkinji gezek baýdaklaryň aşak goýberilmegi bilen geçiriler.
