Kanadanyň premýer-ministri Jastin Trýudo wezipesinden gidýändigini habar berdi. Partiýa täze lider saýlaýança, ol wezipe borçlaryny ýerine ýetirmegi dowam etdirer, bu birnäçe aý wagt alar diýip, Euronews habar berýär.
Trýudo wezipesinden hökümetde çökgünligiň dowam edän we Liberal partiýanyň ornunyň peselýän şertlerinde gidýär. Partiýanyň içindäki gapma-garşylyklaryň ýakyn wagtda geçiriljek saýlawlarda oňa täsirli lider bolmaga päsgel berýändigini mälim etdi.
Liberal partiýanyň indiki konferensiýasy 8-nji ýanwarda geçiriler, şol wagt partiýa wagtlaýyn ýolbaşçy bellär we täze lider saýlamagyň resmi işine başlar. Şol täze lider gysga wagtlyk hem bolsa, premýer-ministr bolar. 2025-nji ýylyň oktýabr aýyndan gijä galman parlament saýlawlary geçer, onda megerem Liberal partiýanyň utuljagy ikuçsuz görünýär.
Trýudo 2013-nji ýyldan bäri Liberal partiýa ýolbaşçylyk edýär we 2015-nji ýylda premýer-ministr boldy. Onuň döwründe Kanada ewtanaziýany kanunlaşdyrdy, parnik gazlarynyň zyňyndylaryna salgyt girizdi, bir gezek ulanylýan plastikleri gadagan etdi, ýarag edinmek hukugyny çäklendirdi we dürli kömek pullaryny, esasanam çagalara berilýän kömek pullaryny ep-esli ýokarlandyrdy. Şeýle-de bolsa, şeýle sosial gönükdirilen syýasat, esasanam kömek pullarynyň köpelmegi uly býujet çykdajylaryny talap edýärdi. Döwlet karzynyň we hümmetsizlenmäniň ýokarlanmagyna sebäp bolan koronawirus pandemiýasy ýagdaýy hasam agyrlaşdyrdy.
Syýasy çökgünlik 2024-nji ýylyň dekabrynda, premýer-ministriň orunbasary we maliýe ministri Kristiana Friland Trýudo-nyň garyp maşgalalaryň kömek pullaryny artdyrmak baradaky wadasy bilen ylalaşman, işinden aýrylanda hasam ýitileşdi. Onuň gitmegi bilen Trýudony partiýasynyň agzalary tankytlap başladylar.
Trýudonyň saýlawçylaryň arasyndaky meşhurlygy durmuşyň bahasynyň ýokarlanmagy sebäpli azaldy. Soňky pikir soraşmalardan toplanan maglumatlara görä, indiki saýlawlarda Liberal partiýa sesleriň 20% -ine, oppozision Konserwatiw partiýa bolsa 40% -den gowragyna bil baglap biler.
Trýudonyň mirasdüşeri Kanadadan we Meksikadan ýurda getirilýän ähli harytlara 25 göterim salgyt salmak meýilnamasyny yglan eden ABŞ-nyň täze saýlanan prezidenti Donald Trampdan geljek nyrh howplary bilen ýüzbe-ýüz bolar.
Ykdysadyýetçiler şeýle nyrhlaryň Kanadanyň ykdysadyýetine uly zyýan ýetirjekdigini duýdurýarlar.
