“Milan” Italiýanyň Superkubogy ugrundaky oýunda “Interi” utdy. Final oýny Er-Riýaddaky (Saud Arabystany) “Al-Awwal Park” stadionynda geçirildi we “Milanyň” peýdasyna 3:2 hasabynda tamamlandy.
Oýunda “rossoneriler” “Interden” 0:2 hasabynda utulýardy, ýöne kambek etmegi başardy.
Oýnuň birinji ýarymy goşulan minutda (45+1) Lautaro Martinesiň goly bilen tamamlandy. Eýýäm ikinji ýarymyň başynda, 47-nji minutda Mehdi Taremi “Interiň” artykmaçlygyny iki esse artdyrdy. Ýöne “Milan” derrew oýna gaýdyp geldi: Teo Ernandes 52-nji minutda jerime urgusyny geçirdi, 80-nji minutda bolsa hasaby deňlän Kristian Pulişiçe assist berdi. 94-nji minutda aýgytly goly Rafael Leaonyň topy geçirmeginde Temmi Abraham girizdi – bu oýunçylaryň ikisi-de meýdança ikinji ýarymda çykdy.
“Milan” üçin bu 2016-njy ýyldan bäri Superkubokda ilkinji we taryhda sekizinji ýeňiş boldy. Şeýlelikde, klub ýaryşda gazanylan kuboklaryň sany boýunça “Inter” bilen deňleşdi. Iň köp kubok “Ýuwentusda” – 9 ýeňiş.
Topar täze tälimçi Seržiu Konseýsauwyň ýolbaşçylygyndaky ilkinji iki oýunda yzygider iki möhüm kambeki ýerine ýetirdi – mundan öň Superkubogyň ýarym finalynda topar “Ýuwentus” bilen oýunda utdy.
“Inter” ýeňiş gazanan ýagdaýynda yzygider dördünji ýyl Superkubogy alan ilkinji klub bolup bilerdi. Tälimçileriň arasynda ýaryşda ýeňiş sany boýunça rekord eýesi bolan toparyň baş tälimçisi Simone Indzagi bäş titul bilen galdy.
