Amerikanyň Ford awtoulag öndürijisi ýangyç nasoslarynda ýüze çykyp biljek kemçilikler sebäpli 300 müň töweregi Super Duty pikaplaryny yzyna çagyrýandygyny yglan etdi diýip, Motor1 habar berýär.
2020-2022-nji ýyllarda goýberilen, 6,5 litrlik dizel hereketlendirijileri bilen enjamlaşdyrylan 295 449 sany Super Duty pikaplary kemçilikli bolup çykdy. Ýangyç nasoslarynda ýüze çykyp biljek näsazlyk hereketlendirijiniň güýjüniň peselmegine sebäp bolup biler.
Mesele köne ýangyç sebäpli nasoslarda çökündileriň emele gelmegi bilen baglanyşykly, bu esasanam uzak wagtlap sürülmedik awtoulaglara degişlidir.
Ford bu meseläni nasoslary çalyşmagyň ýerine, sowadyşy gowulandyrjak we çökündileriň emele gelmeginiň öňüni aljak programma üpjünçiligini täzelenmek arkaly çözdi. Kompaniýa 2021-nji ýylda nasoslary täze wersiýa bilen çalşandygyny belleýär, ýöne mesele barybir çözülmän galýar.
Yza çagyryş F-250, F-350, F-450, F-550, F-600 we käbir F-650 we F-750 modellerine degişlidir. Kemçilik bilen baglanyşykly ýol heläkçiligi ýa-da şikes alma bellige alynmady diýip, Ford mälim etdi.
Duýduryş haty söwda dellallaryna eýýäm iberildi, awtoulag eýeleri habary 13-nji ýanwardan başlap alarlar.
Ford geçen ýyly 4 777 161 ulaga täsir eden 67 yzyna çagyryş bilen tamamlandy. Bu 2023-nji ýyldaka garanda 13 çagyryş köp, ýöne täsir eden ulaglaryň sany 1,6 million azaldy.
