Rowaýata öwrülen meşhur "Grand Theft Auto" franşizasynyň täze bölümi diňe bir oýunçylaryň arasynda däl, eýsem, bazar seljerijileriniň arasynda-da görlüp-eşidilmedik gyzyklanma döredýär. Oýnuň altynjy bölümi oýun pudagynda birnäçe rekord goýsa gerek. Ol hatda Golliwudyň blokbasterleriniň üstünliginden hem ozduryp biler diýip, Financial Times gazeti habar berýär.
Hünärmenleriň berýän maglumatlaryna görä, GTA VI-ny döretmek üçin býujet çykdajylary eýýäm 2 milliard dollara golaýlap, taryhdaky iň gymmat oýun boldy. Deňeşdirmek üçin, hiç bir oýnuň býujeti, hatda 1 milliard dollara hem golaýlamandy.
Çaklamalara görä, deslapky sargytlar, entek oýun resmi taýdan bildiriş edilmänkä, Rockstar Games kompaniýasyna, takmynan, 1 milliard dollar girdeji getirer diýip garaşylýar. Bilermenler oýnuň ilkinji ýylynyň umumy girdejisiniň 3,2 milliard dollar bolmagyna garaşýarlar. Şeýle san GTA V-iň görkezijilerinden iki esseden hem köpdür.
GTA VI-nyň üstünligi “Tapmaça 2” (1,7 milliard dollar) multfilmi we “Dedpul we Rosomaha” filmi (1,3 milliard dollar) ýaly, geçen ýylyň iň meşhur kino premýeralaryndan hem öňe geçip biler.
Oýny 2025-nji ýylyň güýzünde goýbermek meýilleşdirilýär. Ol PS5 we Xbox Series konsollarynda çykar. Täze önüm eýýäm Rockstar Games-iň iň iri bäsdeşlerini bildirişlerini yza süýşürmäge iterdi: her kim bäsdeşlikden gorkýar.
Hünärmenler GTA VI-nyň çykarylmagynyň oýun pudagy üçin möhüm waka boljakdygyna ynanýarlar. Sarp edijileriň wideo oýunlaryna we mazmuna edýän çykdajylary 2025-nji ýylda 2,2% ösüp, 195 milliard dollara ýeter diýlip çaklanylýar. Şeýlelik bilen, GTA VI diňe bir oýunda täze standartlary kesgitlemän, eýsem pudagyň ösmegine hem möhüm goşant goşjakdygyny wada berýär.
