2025-nji ýylyň 4-nji fewralynda RM Sotheby's auksion öýi seýrek Koenigsegg Agera X giperkaryny satuwa çykarar. Bu awtoulag goýberilen ýedi nusganyň biri bolup, 2011-nji ýylda ýörite nemes kollektory üçin çykaryldy.
Lotuň soňky bahasynyň 2,4 million dollar bolmagyna garaşylýar.
Agera 2010-njy ýylda hödürlenip, 950 at güýjüni öndürýän bäş litrlik V8 hereketlendirijisi bilen enjamlaşdyrylandyr. Geçiriş gutusy ýedi tizlikli goşa ssepleniýalydyr.
Auksiona çykjak “X” wersiýasynda “Formula 1-iň” awtoulaglaryndan ylhamlanan iki ýarysly yzky spoýler we özboluşly setin örtükli uglerod süýmünden ýasalan korpusy bar. Bu şeýle bezegli ilkinji Koenigsegg awtoulagydyr.
Giperkaryň salonynyň hem öz taryhy bar: başda ol ak deriden edilipdi, ýöne 2020-nji ýylda gyzyl tikinli gara deri we alkantara çekdirilip gaýtadan tikildi. Oturgyçlar markanyň gelip çykyşyna hormat hökmünde Şwesiýanyň baýdagynyň reňkleri bilen bezelen.
20 000 kilometrden gowrak ýol geçendigine garamazdan, Agera X ajaýyp ýagdaýda saklanypdyr. Eýesi ýaňy-ýakynda Koenigsegg-iň Mýunhendäki resmi merkezinde awtoulagy tehniki hyzmatdan geçiripdir, bu bolsa ulagyň ulanmaga taýýardygyny tassyklaýar. 2,4 million dollarlyk diýip goýlan baha soňky ýyllarda auksionda hödürlenen beýleki Koenigsegg modelleriniň bahasyna laýyk gelýär.
