Toyota Tailandyň intellektual eýeçilik bölüminde Hilux Travo haryt nyşanyny patentledi. Bu ygtybarlylygy we köp taraplylygy bilen tanalýan meşhur pikap awtoulagynyň dokuzynjy nesliniň taýýarlanýandygyna şaýatlyk edip biler diýip, Headlightmag belleýär.
Tailandda Hilux-yň her gezek gaýtalanmasy adatça öz adyny alýar. Mysal üçin, sekizinji nesil Hilux Revo, ýedinji nesil bolsa Hilux Vigo diýlip atlandyrylýar. Beýleki ýurtlarda pikap üýtgemeýän Hilux ady bilen satylýar.
Deslapky maglumatlara görä, täze nesil çarçuwa gurluşyny saklar, ýöne tehniki taýdan täzelener. Öň we yz bölekleriniň dizaýnynyň gaýtadan işlenmegine garaşylýar, şol bir wagtyň özünde kabinasy we gapdal panelleri öňküligine galar.
Esasy häsiýetnamalary şulardan ybarat:
- häzirki modelinde eýýäm bar bolan ýumşak gibrid ulgamly 2,8 litrlik dizel hereketlendirijisi;
- bazara baglylykda, Ýewro-5 we Ýewro-6 standartlaryna laýyk gelýän benzin we dizel hereketlendirijili modifikasiýalar;
- 2025-nji ýylyň ahyryna çenli Tailandda köpçülikleýin öndürip başlamak meýilleşdirilýän pikapyň doly elektrik görnüşi.
Hilux-yň häzirki nesli 2015-nji ýylda peýda bolupdy we birnäçe gezek täzelendi, şol sanda 2024-nji ýylda awtoulag täze bamper we radiator gözenegini aldy.
