Los-Anjelesdäki çatryklaryň birinde üýtgeşik ýol-ulag hadysasy bolup geçdi – robotaksi bilen robot-kurýer çaknyşdy. Bu maşynlary dolandyrýan kompaniýalar heläkçiligiň sebäplerini derňeýärler. Hadysanyň netijesinde hiç kim zyýan çekmedi diýip, TechCrunch belleýär.
Hadysa Täze ýyldan öň bolup geçdi: Waymo kompaniýasynyň robotaksisi öwrümde Serve Robotics kompaniýasynyň robot-kurýerini kakdy. Kurýer Günbatar Golliwudda köçäni kesip geçip, ýanýoda çykmaga synanyşdy. Şu pursat öwrümden Waymo taksisi çykyp, çaknyşyk bolup geçdi.
Wideonyň awtory, kadrlardan aňşyrmak kyn bolsa-da, robot-kurýeriň köçäni gyzyl yşykda kesip geçendigini aýdýar. Robotlaryň ikisi-de zyýan çekmedi we bir minutdan hereketi dowam etdirdi.
Serve Robotics munuň robot-kurýerleriniň robotaksi bilen ilkinji çaknyşma hadysasydygyny habar berýär. Hadysa wagtynda kurýer dispetçer tarapyndan uzak aralykdan dolandyrylýardy, bu bolsa hereketli çatryklardan geçmek üçin kompaniýanyň düzgünleri tarapyndan göz öňünde tutulandyr.
Waymo kompaniýasy taksiniň bort kompýuteriniň kurýeri jansyz predmet hökmünde kabul edendigini, şonuň üçin çaknyşykdan gaçmak režiminiň ýokary seresaplylyga sazlanmandygyny belledi. Muňa garamazdan, robotaksi derrew saklandy we urgy 6 km/sag-dan gowrak tizlikde bolup geçdi, bu hem zeper ýetmeleriň öňüni almaga mümkinçilik berdi.
Kompaniýalaryň wekilleri hadysany ara alyp maslahatlaşmak we geljekde şeýle hadysalaryň öňüni almak üçin aragatnaşyk saklaýar. Köçelerde robotlaşdyrylan ulaglaryň sany artýar, şonuň üçin şeýle ýol-ulag hadysasy aýratyn ünsi talap edýär diýip, hünärmenler belleýär.
