Volkswagen awtoöndürijisi Volkswagen, Audi, Seat we Skoda markaly elektromobilleriň 800 müňden gowrak eýesiniň maglumatlary syzandan soň dawanyň merkezine düşdi. Näsazlyk 2024-nji ýylyň tomsunda Amazon bulut infrastrukturasynda maglumatlaryň nädogry saklanmagy sebäpli ýüze çykdy diýip, Kod.ru habar berýär.
Syzdyrylan maglumatlar geolokasiýany, akkumulýatoryň ýagdaýyny we awtomobiliň iş ýagdaýyny öz içine alýardy. 466 müň hadysada geomaglumatlar eýeleriň işjeňliginiň jikme-jik profilini döretmäge mümkinçilik berdi. Bu hadysadan zyýan çekenleriň arasynda syýasatçylar, telekeçiler, polisiýa işgärleri we ähtimal, ýörite gulluklaryň işgärleri hem bar.
Şeýle gowşaklygy garaşsyz bir hünärmen anyklap, bu barada Chaos Computer Club assosiasiýasyna habar berdi. Gurama düzgünleşdiriji edaralara, şol sanda Germaniýanyň IIM-ine we Aşaky Saksoniýanyň maglumatlary goramak boýunça ygtyýarly edarasyna duýdurdy.
Näsazlyk Volkswagen Group-yň programma üpjünçiligini işläp taýýarlamaga jogap berýän Cariad golçur kompaniýasy tarapyndan dessin düzedildi. Kompaniýa müşderileriň maglumatlaryna kesekileriň elýeterliligini blokirledi we müşderileriň parollarynyň hem töleg maglumatlarynyň goraglydygyny aýtdy.
Waka germaniýaly syýasatçylar tarapyndan tankytlara sebäp boldy, olar awtomobil pudagynda maglumatlary goramak çärelerini güýçlendirmegi talap etdiler.
