Hytaýyň Huawei kompaniýasy şu ýylyň üç çärýeginiň jemi boýunça Apple-den öňe geçip, dünýäde goşara dakylýan elektronika bilen iň uly üpjün ediji boldy. Kompaniýa öz bazar paýyny 16,9%-e çenli artdyrdy.
IDC-niň maglumatlaryna görä, Huawei üpjünçiligiň möçberini ýyllyk hasabynda 44,3% ýokarlandyrdy. Kompaniýa müşderilere 23,6 mln akylly sagatlary we fitnes bilezikleri iberdi.
Apple 22,5 mln gurluş bilen ikinji orna düşdi, onuň bazar paýy 16,2%-e deň.
Hytaýyň içerki bazarynda-da Huawei 35,7% paý bilen birinji orny eýeleýär, Apple bolsa dördünji orunda ýerleşýär (7,3%). Amerikan kompaniýasyndan öňde Xiaomi (21%) we BBK (16,9%) bar.
Huawei-niň üstünligi GT5, GT5 Pro we Watch D2 ýaly täze modelleriň çykmagy hem-de lokalizasiýa we dünýä bazarlarynda ilerletme bilen baglanyşyklydyr.
Xiaomi üpjünçiligini 26,5% ýokarlandyryp, dünýä bazarynda üçünji ornuny saklady. Öňdebaryjylaryň bäşligini Samsung we BBK jemleýär.
Şol bir wagtyň özünde, akylly sagatlaryň global bazary 3,8% pese düşdi, bilezikleriň satuwy bolsa 12,7% ýokarlandy.
