39 ýaşly horwatiýaly ýarymgoragçy Luka Modriç Madridiň “Realy” Yklymara kubogynyň “Paçuka” bilen final oýnunda ýeňiş gazanandan soň, “Patyşalyk klubunyň” taryhynda iň köp titula eýe bolan futbolçy boldy. Ol klubuň düzüminde 28-nji kubogyny gazandy.
Modriç 70-nji minutda Rodrigonyň ornuny çalşyp, meýdança çykdy. Ol gol ýa-da assist bilen tapawutlanmasa-da, onuň häzire çenli klubuň üstünliklerine goşan goşandy oňa klubuň taryhynda kubok sany boýunça absolýut rekord eýesi bolmaga mümkinçilik berdi.
Bu görkeziji boýunça Modriç häzirki wagtda bogun damarynyň şikesinden soň dikelýän “Realyň” sag goragçysy Daniel Karwahaldan (27 kubok) öňe geçdi. Klubuň taryhynda iň köp titully oýunçylaryň üçlügini geçen ýyl kluby terk eden goragçy Naço Fernandes (26 kubok) jemleýär. Dördünji orny birbada “Realyň” öňki iki lideri – Karim Benzema bilen Marselo paýlaşýar. Olaryň ikisiniň hem hasabynda klubuň düzüminde 25 kubok bar.
Modriç “Patyşalyk klubunyň” düzüminde 2012-nji ýyldan bäri çykyş edýär.
