Afrikada ýylyň oýunçysy hökmünde Italiýanyň “Atalanta” futbol klubunyň we Nigeriýanyň milli ýygyndysynyň hüjümçisi Ademola Lukman yglan edildi. Futbolçy Afrika Futbol Konfederasiýasynyň baýragy bilen sylaglandy.
CAF Awards 2024 baýragynyň gowşurylyş dabarasy 16-njy dekabrda Marrakeşde (Marokko) geçirildi. Lukman ses berişligiň netijesi boýunça iň gowusy hökmünde saýlandy.
Şeýle-de, baýraga “Braýtonyň” oýunçysy Simon Adingra, Dortmundyň “Borussiýasynyň” hüjümçisi Seru Girassi, “PSŽ-niň” goragçysy Aşraf Hakimi we “Mamelodi Sandunsyň” oýunçysy Ronwen Uilýams dalaş etdi. Şu ýyl, garaşylandygyna garamazdan, sanawa “Liwerpulyň” müsürli hüjümçisi Mohamed Salah we Türkiýäniň “Galatasaraýynda” kärendesine çykyş edýän “Napoliniň” nigeriýaly hüjümçisi Wiktor Osimhen goşulmady.
Geçen möwsümde Ademola Lukman “Atalantanyň” düzüminde ähli ýaryşlarda 45 oýna gatnaşyp, 17 gol geçirdi we dokuz assist berdi.
