The Game Awards 2024 ýubileý dabarasy tomaşaçy gyzyklanmalarynyň öňki ähli rekordlaryny täzeledi. Onuň ýaýlymyna YouTube-da, Twitch-de we X, TikTok ýaly beýleki sosial ulgamlarda bir wagtyň özünde 4 milliondan gowrak adam tomaşa etdi. Dabara resmi kanaldan daşary 1500 kanalda ýaýlyma berildi diýip, Gagadget habar berýär.
Umuman alanyňda, dabara rekord 15,2 mln sagat tomaşa edildi. Şouwyň dowamlylygy tas bäş sagat boldy, muňa garamazdan auditoriýa yzygiderli gyzyklanmany saklady. Tomaşa etmeleriň iň ýokary derejesi “Ýylyň oýny” nominasiýasynda ýeňijiniň yglan edilen wagty boldy.
Tomaşaçylaryň ortaça sany 3,1 mln adam bolup, 2023-nji ýyldaky rekorddan (3,6 mln) birneme yza galdy.
Resmi kanalda treýlerleriň arasynda has köp tomaşa edileni Yakuza döredijileriniň täze oýny Project Century-nyň anonsy boldy. Ýöne ähli kanallary alanyňda The Witcher 4 oýnunyň treýleri öňdebaryjy boldy.
Ýatlap geçsek, baş nominasiýada baýragy Astro Bot ekşen-platformeri aldy. Şol bir wagtyň özünde onlaýn ses berişlikde geýmerler iň gowy oýun hökmünde Black Myth: Wukong ekşenini saýladylar.
