Täze zelandiýaly Naýjel Riçards ispan dilini bilmese-de, stolüsti skrebbl (söz düzmek) oýny boýunça Ispaniýanyň çempionatynyň ýeňijisi boldy. Bu barada The Guardian we Associated Press habar berýär.
Käbir gatnaşyjylar şeýle netijäni “masgaraçylyk” hökmünde kabul etdi, beýlekiler bolsa onuň ýeňşini “manysyzlygyň çür depesi” diýip atlandyrdy, çünki skrebbl boýunça ispan çempionatlarynda şeýle waka ilkinji gezek bolýar. Bäsleşige 20 ýurtdan 150-den gowrak oýunçy gatnaşdy.
Şol bir wagtyň özünde, Riçardsyň ýeňşi onuň kärdeşleri üçin garaşylmadyk waka bolmady. Ol eýýäm bäş gezek iňlis dilinde skrebbl boýunça çempionatlaryň ýeňijisi boldy, şeýle-de fransuz dilini bilmese-de, Fransiýanyň çempiony boldy. Ýaryşlar üçin Riçards sözlükdäki ähli sözleri ýat tutýar.
“Beýlekileriň hem şeýle edip bilmeýändigine düşünip bilemok” – diýip, ol belleýär.
Riçardsyň garşydaşlary onuň bu başarnygyny ykrar edýär.
“Naýjele garşy oýnamak – kompýutere garşy oýnamak ýaly” – diýip, öňki dünýä çempiony Erik Salwador Çuýo belledi.
Onuň aýdanlaryna ikinji orny eýelän Benhamin Olaýsola hem goşulýar. Ol Riçardsy “akyla sygmajak başarnygy” bolan adam diýip atlandyrdy.
