10-njy dekabrda Stokgolm filarmoniýasynda Nobel baýraklarynyň gowşurylyş dabarasy geçirildi. Şwesiýanyň patyşasy Karl XVI Gustaw 11 laureaty lukmançylyk, fizika, himiýa, edebiýat we ykdysadyýet ugurlarynda gazanan üstünlikleri üçin diplomlar we altyn medallar bilen sylaglady diýip, TASS habar berýär.
Gutlag çykyşynda Nobel gaznasynyň dolandyryş başlygy Astrid Sýoderberg Widdig ylmyň global meseleleri çözmekde ähmiýetini belledi.
“Ylym, edebiýat we parahatçylyk häzirki çylşyrymly meseleleri çözmegiň dürli ýollaryny hödürleýär, ýöne olaryň ählisi biziň geljegimizi adamzat hökmünde kör ykbalyň çözmeýändigini ýatladýar. Şeýle-de, bu biziň dünýäni üýtgetmäge güýjümiziň ýetjekdigine umyt berýär” – diýip, ol aýtdy.
Şu ýyl fiziologiýa we lukmançylyk ugrunda baýragyň eýeleri mikroRNK-nyň öwrenilişi üçin Wiktor Ambros we Gari Rawkin boldy. Fizika boýunça baýraga emeli neýron ulgamlary gurşawynda işläp taýýarlamalar üçin Jon Hopfild we Jeffri Hinton mynasyp boldy. Himiýa boýunça baýrak beloklaryň gurluşynyň kompýuter modelirlemesi üçin Dewid Beýkere, Jon Jampere we Demis Hassabise berildi.
Edebiýat baýragyny “taryhy şikeslere garşy durýan we adamzat durmuşynyň gowşaklygyny açyp görkezýän baý şahyrana prozasy” üçin günorta koreýaly ýazyjy Han Gan aldy.
Ykdysadyýet boýunça baýraga milletleriň hal-ýagdaýynndaky tapawutlaryň sebäpleriniň öwrenilendigi üçin Daron Ajemoglu, Saýmon Jonson we Jeýms Robinson mynasyp boldy.
Dabara şa maşgalasynyň, hökümetiň we ylmy elitanyň wekilleriniň gatnaşmagynda şäher edarasynda banket bilen tamamlandy.
Belläp geçsek, esaslandyryjynyň profili bolan Nobel medallary 18 karat altyndan taýýarlanýar we olaryň agramy 175 g, ykdysadyýet boýunça baýrak alanlaryňky – 185 g barabar. 1980-nji ýyla çenli medallaryň agramy 200 g çenli bolup, 23 karat altyndan taýýarlanýardy. Eger medal auksiona çyksa, onuň bahasy diňe bir agramy bilen däl, eýsem kime degişlidigi bilen hem kesgitlenýär. Şu ýyl pul baýragy 11 mln şwed kronyna deň boldy (1 mln ABŞ dollaryndan gowrak).
