Superliganyň guramaçylary ýaryşyň formatynyň taslamasyny ara alyp maslahatlaşdylar. Ilkibaşda oňa Ýewropanyň öňdebaryjy 12 klubunyň gatnaşmagy meýilleşdirilipdi, ýöne Halkara Futbol Federasiýasynyň (FIFA) we Ýewropanyň Futbol Assosiasiýalarynyň Birleşiginiň (UEFA) basyşy astynda toparlaryň köpüsi taslamadan çykdy, diňe Madridiň “Realy” we Kataloniýanyň “Barselonasy” galdy.
Mundo Deportivo neşiriniň maglumatlaryna görä, indi guramaçylar ýaryşy üç diwiziona bölmegi teklip edýärler. Ýokarky (“Ýyldyz”) diwiziona öňdebaryjy 5 ligadan 16 topar, şeýle-de Portugaliýadan we Niderlandlardan güýçli toparlar gatnaşmaly.
Ikinji (“Altyn”) we üçünji (“Gök) diwizionlar, degişlilikde, 16 we 32 topary öz içine alar.
Her ýyl üçünji diwiziondan 20 topar çykar. Güýçli milli ligalaryň çempionlaryna, hatda olar taryhy taýdan uly klublaryň hataryna degişli bolmasa-da, “Ýyldyz” diwizionynda ýer bermek mümkinçiligi maslahatlaşylýar.
Ýokarky diwizionyň toparlaýyn tapgyry her birinde sekiz topar bolan iki toparçadan ybarat bolar. Pleý-off tapgyrynda iki oýundan ybarat çärýek we ýarym finallary, şeýle-de bir oýun görnüşinde final geçirmek meýilleşdirilýär. Guramaçylar oýunlaryň sanyny 19-dan 17-18-e çenli azaltmagy göz öňünde tutýarlar.
Ähli oýunlary milli çempionatlar bilen deň gelmezligi üçin hepdäniň ortasynda geçirmek meýilleşdirilýär.
Ýatlap geçsek, 2023-nji ýylyň dekabr aýynda Ýewropa Bileleşiginiň kazyýeti FIFA we UEFA tarapyndan klublaryň Superliga gatnaşmagyna gadaganlyk girizmegini bikanun diýip yglan etdi. Kazyýetiň metbugat relizinde dünýä futbolynda iň ýokary ýolbaşçy guramalaryň çözgüdiniň Ýewropanyň kanunyna ters gelýändigi bellenilýär.
