“Los-Anjeles Gelaksiniň” futbolçylary ABŞ-nyň we Kanadanyň professional futbol ligasy bolan MLS-iň Kubogynyň altynjy gezek eýesi boldular. Karson-Sitide (Newada) geçirilen pleý-offuň final oýnunda olar “Nýu-Ýork Red Bullzy” 2:1 hasabynda utdular.
Ýeňijilerden Jozef Peýntsil (9-njy minut) we Deýan Ýoweliç (13) gol girizdi. Garşydaş topardan Şon Nilis tapawutlandy (28).
Bu “Gelaksi” üçin ýaryşda altynjy ýeňiş boldy we bu täze rekorddyr. Geçen gezek olar on ýyl mundan ozal – 2014-nji ýylda ýeňiş gazanypdylar. Kubok sany boýunça ikinji orny “Di Si Ýunaýted” (4 ýeňiş), üçünji orny “Kolambus Krýu” (3 titul) eýeleýär.
“Gelaksiniň” düzüminde tituly Dortmundyň “Borussiýasynyň” we Germaniýanyň milli ýygyndysynyň öňki futbolçysy Marko Roýs gazandy.
Belläp geçsek, MLS geografik alamat boýunça Günbatar we Gündogar konferensiýalara bölünýär. Gündogar konferensiýasynda 15 topar, Günbatar konferensiýasynda 14 topar çykyş edýär. MLS-iň yzygiderli çempionaty mart – oktýabr aýlarynda geçirilýär we bu döwürde her topar 34 oýun oýnaýar. Her konferensiýadan iň gowy alty topar noýabr aýyndan dekabr aýynyň başyna çenli dowam edýän pleý-off tapgyryna çykýar. Bu ýaryş hem liganyň çempionyny kesgitleýän MLS Kubogy üçin soňky oýun bilen tamamlanýar.
Ýatlap geçsek, Lionel Messiniň, Luis Suaresiň, Serhio Busketsiň we Žordi Albanyň çykyş edýän “Inter Maýami” topary pleý-offuň birinji tapgyrynda “Atlanta Ýunaýtedden” utuldy.
