Tiranada (Albaniýanyň paýtagty) özboluşly bir bina peýda bolar. Binagärleriň pikiriçe, diňiň daşky görnüşi bir gurluşa ýygnanan üçekli jaýlar toplumyna meňzeýär.
"Network of Architecture" (NOA) studiýasy tarapyndan döredilen taslama “Tirananyň pazly” diýilýär. Binany Tirana şäheriniň günorta-günbatar bölegindäki Ruga Medar Ştilla köçesinde gurmak meýilleşdirilýär. Onuň boýy 71 metr, esasy tutýan meýdany bolsa 75-25 metr bolar .
“Jaýlar pazlyň bölekleri ýaly işleýär. Biri-birine salynýar, gurluşa laýyk gelip “basýança” aýlanýar" diýip, NOA-ny esaslandyryjy Lukas Rungger aýtdy.
Taslama Tiranyň häzirki zaman binagärçiliginiň çäginde işlenip düzüldi. Esasy ideýa şäheriň çalt ösüşini görkezýän şäher we oba stilleriniň garyşmagyny özünde jemleýär.
"Biz şäheriň ösüşini alamatlandyrýan oba ýerinden şäher durmuşyna geçişi suratlandyrmaga synandyk" diýip, Rungger sözüniň üstüne goşdy.
Bina daşyndan köp sanly kiçijik jaýdan ybarat ýaly görünse-de, binanyň içi yzygiderli, bitewi giňişlikdir.
Bu desga köp wezipeli bolar. Birinji gatda täjirçilik jaýlary (ýerasty awtoulag duralgasy bilen üpjün ediler) we ýokarda myhmanhana, kwartiralar ýerleşer. Ýedinji-on altynjy gatda 70-den 130 inedördül metre çenli 158 sany kwartira bolar. Iň ýokarky üç gaty penthouslar tutar, olaryň her biri beýlekisinden baglar bilen aýrylar.
Binanyň daşky görnüşiniň esasy aýratynlyklaryndan biri 8-nji we 11-nji gatyň arasyndaky açyk eýwan (terras) bolup, ol ýerde “ters gurlan jaý” bolar. Binanyň käbir elementleri, şol sanda açyk eýwanlar (terraslar) janly ösümlikler bilen bezeler.
Taslama deslapky tassyklamany aldy we gurluşygyň ýakyn wagtda başlamagyna garaşylýar. Binanyň gurluşyk işleriniň tamamlanjak senesi entek mälim edilmedi.
