“Gara geýimli adamlar” (Люди в черном) we “Bagtyň kowgusy” (В погоне за счастьем) filmleri bilen tanalýan amerikaly aktýor Uill Smit Positiv Festival aýdym-saz festiwalynda çykyş eder. Bu barada Rolling Stone habar berdi.
Smit 31-nji iýulda Fransiýanyň Oranž şäherinde ýerleşen Antik teatrynda çykyş eder. Ol ilkinji gezek Fransiýanyň çäginde öz rep aýdymlaryny ýerine ýetirer.
Uill Smit aýdym-saz festiwalynyň ilkinji yglan edilen gatnaşyjysy boldy. Çärede başga kimiň çykyş etjekdigi heniz belli däl.
Festiwala gatnaşmagy Smitiň aýdym-saz pudagyna gaýdyp gelýändigini aňladar. Gürrüňlere görä, häzirki wagtda artist täze albomynyň üstünde işleýär. Ýakynda ol “Work of Art” aýdymyny çykardy.
Aprel aýynda Smit “Koaçella” festiwalynda kolumbiýaly sazanda Jeý Balwine goşuldy. Şeýle-de, aktýor iýun aýynda BET Awards baýragynyň gowşurylyş dabarasynda çykyş etdi.
Belläp geçsek, öň Smit dört “Gremmi” baýragyny aldy. Ol karýerasynda dört albom çykardy: 1997-nji ýylda “Big Willie Style”, 1999-njy ýylda “Willennium”, 2002-nji ýylda “Born to Reign” we 2005-nji ýylda “Lost and Found”. Bu albomlara “Gettin’ Jiggy Wit It”, “Girls Ain’t Nothing But Trouble” we “A Nightmare on My Street” ýaly aýdymlar girdi.
