Intel-iň baş direktory Pet Gelsinger 1-nji dekabrda eýeleýän wezipesinden aýryldy we kompaniýanyň direktorlar geňeşinden çykdy. Bu barada kompaniýanyň 2-nji dekabrda ýaýradylan metbugat beýanatynda aýdylýar.
Täze baş direktor saýlanýança, kompaniýa wagtlaýyn Intel-iň wise-prezidenti we baş maliýe işgäri Dewid Zinsner we Intel Products-yň baş direktory Mişel Jonston Holthaus ýolbaşçylyk eder. Geçiş döwründe Intel-iň direktorlar geňeşiniň garaşsyz başlygy Frenk Godi wagtlaýyn ýerine ýetiriji başlyk bolar.
Pet Gelsinger Intel-de 1979-2009-njy ýyllar aralygynda işledi. 2021-nji ýylyň fewralynda ol ýene-de kompaniýa gaýdyp geldi we baş direktory boldy. Intel-e baş bolan Gelsinger üýtgedip gurmak we çykdajylary azaltmak boýunça maksatnammasyny durmuşa geçirip başlady.
Soňky ýyllarda kompaniýa maliýe kynçylyklaryny başdan geçirýär, şonuň üçin köp işgärlerini işden aýyrýar. Ýüze çykan çökgünligiň fonunda habar beriş serişdelerinde ykjam çip öndürijisi Qualcomm-yň Intel -i satyn almakçy bolýandygy baradaky habarlar ýaýrady.
