Şotlandiýanyň günbatar kenaryndaky 209 ýaşly Korswoll maýagy gözden geçirilende, inžener Ross Rassel uzak geçmişden galan ýazgyly çüýşäni tapdy. Tapyndy şkafdaky köne paneller aýrylanda ýüze çykaryldy diýip, The New York Times gazeti ýazýar.
1892-nji ýylyň sentýabr aýy diýlip sene goýlan habary maýagyň yşyklandyryş enjamlaryny çalyşýan inženerler galdyrypdyr.
Maýagyň gözden geçirişe gatnaşan sakçysy Barri Miller: "Eger bu hazynanyň kartasy bolup çykan bolsa, açyş barada dymmaga kasam edipdik" – diýip degişdi.
Emma hatyň mazmuny adaty bolup çykdy. Bu hatda işçileriň, kompaniýanyň atlary we abatlaýyş işleriniň tamamlanan senesi görkezilipdir:
“Bu çyrany Milton-Haus, Edinburgde, “Jeýms Miln we ogly” şereketinde işleýän inžener Jeýms Uells, mehanik Jon Westwud, inžener Jeýms Brodi we işçi Dewid Skott maý aýyndan sentýabr aýy aralygynda gurdy we 1892-nji ýylyň 15-nji sentýabrynda penşenbe güni agşam ýakyldy."
Rassel bilen Miller hata öz teswirlerini goşup, gözegçileriň geljekki nesilleri üçin ony öňki ýerinde goýmagy karar etdiler.
Tapyndy diňe bir 1817-nji ýylda gurlan maýagyň taryhyny ýatlatman, eýsem XIX asyryň tehniki ösüş derejesine düşünmäge hem kömek edýär. Maýak 1994-nji ýyla çenli deňizçilere ýol görkeziji çyra bolup hyzmat etdi.
