Halkara Ýeňil atletika federasiýalarynyň assosiasiýasy (World Athletics) ukrainaly beýiklige böküji Ýaroslawa Maguçihi 2024-nji ýylyň iň gowy zenan ýeňil atletikaçysy diýip ykrar etdi. Bu barada federasiýa ýekşenbe güni, 1-nji dekabrda X sosial ulgamynda habar berdi.
Ses berişligiň finalynda Maguçih ýedi görnüşli ýaryşda Oýunlar-2024-üň Olimpiýa çempiony bolan belgiýaly Nafissata Tiamdan öňe geçdi.
Ukrainaly türgen World Athletics baýragyna yzygider üçünji ýyl dalaş etdi, ýöne baýragy ilkinji gezek aldy.
Dünýäde 2024-nji ýylyň iň gowy ýeňil atletikaçysy şwesiýaly şestli böküji 25 ýaşly Arman Dýuplantis boldy. Ol iki gezek Olimpiýa çempiony we 6,25 m Olimpiýa rekordynyň eýesidir.
Oktýabr aýynyň ahyrynda 23 ýaşly Maguçih 2024-nji ýylda Ýewropanyň iň gowy zenan ýeňil atletikaçysy diýlip atlandyryldy. Bu baýrak oňa Demirgazyk Makedoniýanyň paýtagty Skopýede geçirilen Golden Tracks dabarasynda gowşuryldy.
Parižde geçen 2024-nji ýylyň tomusky Olimpiýa oýunlarynda Ýaroslawa Maguçih ilkinji synanyşykda 2 metr beýiklikden geçip, öz dissiplinasynda altyn medalyň eýesi boldy.
Şeýle-de, şu ýyl ol 2,10 metr netijäni görkezip, yzygider üçünji gezek “Brilliant ligasynyň” finalynda utup, zenanlaryň arasynda beýiklige bökmekde dünýä rekordyny täzeledi. Bu görkeziji bilen türgen bolgariýaly Stefka Kostadinowanyň 37 ýyl saklanan öňki rekordyndan 1 sm geçdi.
