General Motors (GM) hyzmatdaşy TWG Global bilen bilelikde täze topar döredip, 2026-njy ýylda “Formula-1-e” goşulmakçydygyny resmi taýdan habar berdi. Şeýle-de, kompaniýa geljekki ýaryşlar üçin hususy hereketlendirijilerini işläp taýýarlamagy meýilleşdirýär diýip, BBC Sport habar berýär.
GM-e degişli bolan Cadillac brendi titul hemaýatkäri bolar hem-de 2026-njy ýyla çenli taýýar boljak hereketlendirijileri işlemek bilen meşgullanar.
Liberty Media-nyň ýolbaşçysy Greg Maffeý GM ýaly iri amerikan brendiniň çempionata goşulmagynyň ABŞ-da “Formula-1-iň” meşhurlygynyň artmagyna ýardam etjekdigini we täze tomaşaçylary çekjekdigini belledi. FIA-nyň prezidenti Mohammed Ben Sulaýem hem bu çözgüdi gutlap, toparyň çempionata üstünlikli girmegi üçin GM bilen işleşmäge taýýardygyny aýtdy.
Pul baýraklarynyň paýynyň azalmagynyň öwezini dolmak üçin GM we TWG Global “Formula-1-iň” häzirki toparlaryna 450 mln dollar tölär.
Cadillac-yň goşulmagy bilen hereketlendirijileri öndürýänleriň sany Mercedes, Ferrari, Ford, Honda we Audi bilen bilelikde alta ýeter. Gibrid düzüjileriň paýyny 50%-e çenli ýokarlandyrýan 2026-njy ýylyň hereketlendirijiler bilen baglanyşykly täze düzgünleri Ford, Audi, GM we Honda öndürijilerini işe çekmek üçin esasy faktor boldy.
