Russiýaly syýahatçy Fýodor Konýuhow 2025-nji ýylyň dekabrynda Antarktidadaky Liwingston adasyna ýeke özi ekspedisiýa ugrar. Saparyň maksady - polýar stansiýasyny gurmak we mikroplastikden hapalanmak meselesini öwrenmek diýip, ol Argentinanyň žurnalistlerine gürrüň berdi.
“Bu adanyň uzynlygy 20 kilometre, ini 6 kilometre barabar. Ol ýerde hiç kim ýok. Diňe pingwinleriň, týulenleriň we albatroslaryň koloniýasy bar. Ilki bilen ol ýere bir möwsüme, iki aýlyk gitmek isleýäris "- diýip syýahatçy belledi.
Beýleki zatlar bilen birlikde, Konýuhow ada rus dilindäki Smolenskaýa adyny gaýtaryp bermek isleýär.
Konýuhow: "Biz polýar stansiýasyny gurup, oňa Smolenskaýa diýip at bermegi makul bildik" – diýip gürrüň berdi. Häzir ada “Iňlis dilindäki kartalaryň has giň ýaýramagy sebäpli Liwingston ady bilen meşhurdyr” diýip, TASS ýazýar.
Konýuhow adada Antarktidanyň mikroplastika bilen hapalanmagy temasy boýunça ylmy barlaglaryny geçirer. Stansiýa iki çadyrdan ybarat bolar. Syýahatçy birinde ýaşamagy, beýlekisinde bolsa barlaglary geçirmegi meýilleşdirýär.
Konýuhow Antarktika hakyndaky şertnama gol çeken ýurtlaryň geňeşinden eýýäm rugsat alandygyny aýtdy. Ol: "Ýekelikde barlag geçirmek has aňsat, çünki ýanyňa az zat äkidýärsiň we göterip gezjek zadyňam az bolýar" –diýip düşündirdi.
Häzirki wagtda Konyuhow Uşuaýa şäherinde bolup, Çiliniň Gorn burnundan Awstraliýanyň Luin burnuna çenli kürekli gaýykda ýüzmäge taýynlanýar. Ol bu aralygy 200 günde geçer. Kenara 25-nji noýabrdan 5-nji dekabr aralygynda çykmagy meýilleşdirýär.
