Atlantika ummanyndaky Günorta Georgiýa adasynda Belgiýanyň ýabany tebigat boýunça fotosuratçysy Iw Adams ilkinji gezek seýrek duş gelýän, tutuşlygyna şar gara reňkli ýelege basyrylan pingwini surata aldy. Bu barada Daily Mail neşiri habar berýär.
Alymlaryň pikirine görä, şa pingwinleri üçin guşuň özboluşly gara reňki melaniniň aşa köpelmegine sebäp bolýan seýrek genetiki mutasiýa bilen baglanyşyklydyr. Şol sebäpli haýwanyň ýelekleri we garny adaty ak, sary tegmillerini ýitirýär. Şeýle guşlar ýüz müňlerçäniň arasynda bir gezek duş gelýär. Bu pingwinlere ýaşamak has kyn, sebäbi olar Antarktikanyň açyk reňkli landşaftynda hemişe göze ilýär, beýlekiler üçin ak garyn, köplenç, daş-töwerek bilen garyşyp gitmäge kömek edýär.
Pingwin ekspedisiýa wagtynda Sent-Endrýus aýlagynda tapyldy. Ekspedisiýanyň ýolbaşçysy guşy ilkinji bolup gördi, soň bolsa fotosuratça bu barada habar berdi. Adams ony surata düşürmek üçin dessine kenara ylgady. Wagt azdy, pingwin koloniýa tarap barýardy, barlagçylar guşlary bilelikdekä biynjalyk etmejek bolýardylar.
"Uzakdan gara reňk şar gara bolup görünýär, ýöne ýakynlaşdygyňsaýy boýnundaky we garnyndaky käbir tegmiller metal ýaşyl ýaly görünýär" – diýip, Adams gürrüň berdi.
Fotosuratçy birnäçe gezek surata aldy, soňra pingwin koloniýa goşulanda, kowumdaşlarynyň täsin guşa nähili garaýandyklaryna syn etdi. Beýleki pingwinleriň ony saýry saýmaýandygyny belläp geçdi.
