Seýrek duş gelýän, hümmeti üç pens bolan şaýy pul numizmatik auksionda 2,5 million dollara satyldy. “Täze Angliýanyň” ýa-da “Massaçusetsiň” kümüş üç şaýlygy 1652-nji ýylda Bostonda zikgelendi we Amerikanyň koloniýalarynyň ilkinji ýyllarynda döredilen seýrek şaýlyklaryň biri hasaplanýar diýip, popsci.com habar berýär.
Nusga 2016-njy ýylda Amsterdamdaky köne şkafdan tapyldy. Bilermenleriň pikirine görä, bu şaýy Niderlandlara 1770-nji we 1780-nji ýyllarda patyşalykda ilçi bolup işlän we soňra ABŞ-nyň 2-nji prezidenti bolan Jon Adamsyň maşgalasy tarapyndan getirilen bolmagy mümkin diýip hasaplanýar. Adamsyň aýaly Boston zikgehanasyny esaslandyryjylaryň biri Jon Hall bilen garyndaş eken.
Bostonyň zikgehanasy 1652-nji ýylyň 27-nji maýynda şaýlyklary çykaryp başlady we çykarylan ähli şaýlyklar seýrek hasaplanýar, ýöne rekord gazanan üç penslik şaýynyň ajaýyplygy onuň edara resmi taýdan açylmazyndan birnäçe hepde öň çykandygy bilen baglydyr. Ýaňy-ýakyna çenli şular ýaly üç penslik şaýyň diňe biriniň bardygy bellidi, ol Massaçusetsiň taryhy jemgyýetinde saklanýar.
Lotuň ahyrky bahasy asylky bahasyndan üç esse köpdi. Şaýy pul auksionda dessine näbelli kolleksioneriň eline geçdi.
