Italiýaly suratkeş Maurisio Kattelanyň kümüş reňkli skoç bilen ak diwara ýelmenen banany Sotheby’s auksionynda 6,2 million dollara satyldy diýip, The New York Times habar berýär.
Ilkibaşda installýasiýanyň 1,5 million dollar gazanmagyna garaşylýardy.
Banan bilen birlikde alyja hakykylyk şahadatnamasy we banany çüýränden soň ony nädip çalşyp boljakdygy barada görkezmeler berler.
Installýasiýany hytaýly kripto-telekeçi we sungat kolleksioneri Jastin San satyn aldy. Ol auksionda iň ýokary mukdary teklip edip, alty bäsdeşini ýeňdi.
Jastin San bu installýasiýany “sungat dünýäsini, ýatlamalary we kriptowalýuta jemgyýetini birleşdirýän” medeni hadysa diýip atlandyrdy. Ol ýakyn wagtda "sungatyň taryhynda we meşhur medeniýetde tutýan ornuna hormat goýmak bilen" banany iýmegi meýilleşdirýändigini aýtdy.
Ýerden 160 santimetr belentlikde skotç bilen diwara ýelmenen banan ilkinji gezek 2019-njy ýylyň dekabrynda Maýamidäki Art Bazel halkara sungat sergisinde görkezildi. Maurisio Kattelan bu eseri “Comedian” diýip atlandyrdy.
Sergiden soň Perrotin Gallery Kattelanyň üç sany bananynyň hersini 120 – 150 müň dollar aralygynda satdy. Galereýada görkezilen bananlaryň ýene birini suratkeş Dewid Datuna iýdi.
