Nike kompaniýasy doly derejede diýen ýaly 3D çap usulynyň kömegi bilen taýýarlanan ilkinji krossowkasy Air Max 1000-i çykardy. Täze önüm aýakgaby 3D çap etmek ugrundan eýýäm tejribesi bolan Zellerfeld kompaniýasy bilen hyzmatdaşlykda döredildi. Krossowka geçen dynç günleri Las-Wegasda geçirilen ComplexCon sergisiniň myhmanlaryna görkezildi.
Dizaýn taýdan Air Max 1000 1987-nji ýylda görkezilen we Nike-yň ökjesi “howa ýassykly” ilkinji krossowkasy bolan Air Max 1-iň täzelenen wersiýasydyr. Bu krossowkanyň aýratynlygy Air Max 1000-de hem saklandy, ýöne “howa ýassygy” 3D printerde çap edilmedi. Krossowkanyň galan bölegi 3D çap usulynyň kömegi bilen taýýarlandy.
Dürli dykyzlykdaky gatlaklary we teksturany garyşdyrmagyň netijesinde aşaky bölekde Air Max 1000-üň dabany has berk boldy, emma krossowkanyň ýokarky bölegi has çeýe we rahat boldy. Bu aýakgaby bagjyklary ulanmazdan geýmäge we çykarmaga mümkinçilik berýär. Şeýle-de, 3D çap usulynyň ulanylmagy Nike kompaniýasyna özboluşly kontur dizaýnyny durmuşa geçirmäge mümkinçilik berdi. Kompaniýanyň bellemegine görä, bu aýakgap önümçiliginiň adaty tehnologiýalarynyň kömegi bilen mümkin bolmazdy.
Ilkibaşda kompaniýa Air Max 1000 krossowkasyny ýiti gyzyl reňkde görkezdi, ýöne soňrak ak, gök we gara-ýaşyl ýaly dürli reňkdäki görnüşler hödürlendi. Başky tapgyr 1000 jübüt krossowkadan ybarat bolup, ol öňünden sargyt etmek üçin serginiň myhmanlaryna elýeterli boldy. Kompaniýa häzirlikçe Air Max 1000-i has köpçülikleýin öndürmek meýilnamasy we täze krossowkalaryň bölek satuw bahasy barada maglumat bermedi.
