Kapitan Artur Rostrona degişli bolan Tiffany & Co. altyn jübi sagady Henry Aldridge & Son auksionynda rekord 1,97 mln dollara satyldy. Bu barada CNN habar berýär.
18 karat altyndan ýasalan sagat kapitana 1912-nji ýylyň 15-nji aprelinde “Titanik” heläkçiliginde aradan çykan üç işewüriň dul aýallary tarapyndan sowgat berildi.
Rostron heläkçiligiň bolan ýerine gelip, 700-den gowrak adamy halas eden RMS Carpathia gämisine komandirlik etdi. Sagat oňa 1912-nji ýylyň 31-nji maýynda Nýu-Ýorkda onuň hyzmatlarynyň ykrar edilmeginiň nyşany hökmünde berildi. Kapitan gark bolýan gämiden heläkçilik signalyny eşidip, Nýu-Ýorkdan Ortaýer deňzine syýahat wagty RMS Carpathia gämisiniň ugruny üýtgetdi.
Sagadyň korpusynda şeýle ýazgy bar:
“Kapitan Rostrona “Titanikden” üç diri galanyň tüýs ýürekden minnetdarlygy we alkyşy bilen sowgat edildi: hanym Jon B.Taýer, hanym Jon Jeýkob Astor we hanym Jorj D.Uaýdener”.
Jon Jeýkob Astor IV “Titanigiň” bortunda iň baý adamdy. Işewüre öz göwreli aýalyny halas ediş gämisine mündürmek başartdy, ýöne özi beýleki 1500 adam bilen bilelikde pida boldy.
Sagady ABŞ-dan hususy kolleksioner satyn aldy.
