Coca-Cola Roždestwonyň öňüsyrasynda täze adaty mahabatyny çykardy. Ýöne bu gezek kompaniýa ony emeli aňyň kömegi bilen taýýarlady. Netijede, ol tomaşaçylar tarapyndan oňyn garşylanmady.
Täze 15 sekuntlyk wideo 1995-nji ýylyň meşhur “Baýramçylyk gelýär” (“Holidays are Coming”) mahabatyna salgylanýar. Gyzyl ýük ulaglary gazlandyrylan içgili çüýşeleri şäheriň ýaşaýjylaryna eltip bermek üçin garly ýoldan sürüp barýar.
Wideoda kiçijik şrift bilen “Real Magic AI tarapyndan döredilen” duýduryşy bar. Secret Level emeli aň studiýasyny esaslandyryjy Jeýson Zada kompaniýanyň öz mirasyny “geljek we tehnologiýalar” bilen birleşdirýändigini, şeýle-de bu tehnologiýanyň wagty we puly tygşytlaýandygyny düşündirýär.
Sosial ulgamlary ulanyjylar bu wideo ýokary baha bermediler. “Eger Coca-Cola-nyň Roždestwo mahabaty emeli aňyň kömegi bilen döredilse, dünýäniň soňy geldi” – diýip, X ulanyjylarynyň biri ýazýar. “Şu wagt telewizorda Coca-Cola-nyň emeli aň tarapyndan döredilen mahabatyny gördüm... Çynyňyzmy, muňa nädip ýol berip bilýäris” – diýip, ýene bir ulanyjy belledi.
Şeýle-de bolsa, Zada wideoda “ýylylygy” döredýän adam faktory henizem bar diýip hasaplaýar we EA-nyň kömegi bilen has köp zady, köp dürlüligi döredip boljakdygyny sözüniň üstüne goşýar.
