Ýel uniwersitetinde aýdymçy Beýonseniň döredijilik mirasy öwrenilip başlanar. Ýokary okuw mekdebinde onuň aýdym-sazynyň we wizual taslamalarynyň ABŞ-nyň syýasy ideologiýasyna ýetirýän täsiri barada kurs giriziler diýip, Associated Press habar berýär.
“Beýonse taryhy ýazýar: aýdym-sazyň täsiri arkaly gara bedenli ilatyň däbi, medeniýet, teoriýa we syýasat” atly kurs ýerine ýetirijiniň 2013-nji ýyldan 2024-nji ýylda çykan “Cowboy Carter” albomyna çenli işlerini öz içine alar.
Bu kursy alyp barjak professor Dafni Bruks talyplaryň diňe bir aýdymlary däl, eýsem 43 ýaşly aýdymçynyň konsertlerinden wideomateriallary hem seljerjekdigini aýtdy. Bruks Beýonseniň döredijiliginiň afroamerikaly aktiwistleriň we filosoflaryň işini nähili şöhlelendirýändigini görkezmegi meýilleşdirýär.
Professor ozal Prinston uniwersitetinde afroamerikaly aýdymçylar barada kurs alyp bardy. Onuň aýtmagyna görä, hut Beýonseniň döredijiligi talyplaryň arasynda aýratyn gyzyklanma döretdi. Ol Ýel uniwersitetinde täze kursuň toparda talyplaryň sanynyň çäklendiriljekdigine garamazdan ünsi özüne çekjekdigini ynanýar.
Beýonse (doly ady – Beýonse Žizel Noulz-Karter) 1981-nji ýylda Tehasda doguldy. Ol karýerasynyň dowamynda 200 milliondan gowrak ýazgy satdy we 32 gezek Grammy baýragynyň eýesi boldy, bu bolsa baýragyň taryhynda rekorddyr.
