Google kompaniýasy iOS-da Chrome brauzeri üçin täzelenme çykaryp, oňa birnäçe täze funksiýany goşdy. Esasy üýtgeşmeleriň biri gözleg üçin bir wagtyň özünde suraty we teksti ulanmak mümkinçiligi boldy diýip, The Verge habar berýär.
Öň ulanyjylar Google Lens arkaly diňe suratyň üsti bilen gözläp bilýärdiler, indi bolsa bu funksiýa aýdyňlaşdyrmak üçin goşmaça tekst soragyny goşmak mümkinçiligi bilen gönüden-göni Chrome-a birleşdirildi. Täze funksiýa netijeleriň has takyk bolmagyna ýardam eder. Mysal üçin, meňzeş harydy tapmak üçin, köýnekçäni surata düşürip, “benewşe” aýdyňlaşdyrmasyny goşup bolar.
Mundan başga-da, täzelenme internetden faýllary we suratlary gönüden-göni Google Photos-da ýa-da Google Drive-da saklamak mümkinçiligini öz içine alýar, bu hem gurluşdaky ýeri tygşytlamaga mümkinçilik berýär. Şeýle täzelik, aýratynam, iCloud-da 5 GB-ni dolduran we Google bulut hyzmatlaryny ulanmagy makul bilýän ulanyjylar üçin peýdaly bolar.
Chrome-yň täze wersiýasynda Shopping Insights funksiýasy-da peýda boldy. Ol ulanyjylara harytlar üçin amatly teklipler barada habar berýär we bahalaryň üýtgeýşini yzarlaýar. Munuň üçin Google akkaunty bilen brauzeriň “taryhyny” sinhronlamaly we degişli sazlamalary işletmeli.
Mundan başga-da, brauzerde mini karta görşi peýda boldy. Indi saýtyň salgylanmasyna basyp, onuň kartada ýerleşýän ýerini aýratyn Google Karta programmasyna geçmezden görüp bolýar.
Kompaniýa ýakyn aýlarda iOS üçin Chrome-a goşmaça funksiýalary goşmagy wada berýär.
