“Barselona” futbol klubunyň ýolbaşçylary ýetip gelýän transfer penjiresi üçin esasy maksatlary kesgitlediler. Ispaniýanyň Sport.es neşiriniň habaryna görä, kataloniýalylar ýokary mümkinçilikleri bolan çep winger we iki sany gyraky goragçy gözleýärler.
Klubuň esasy maksatlarynyň biri hem "Napoli" klubunyň gruziýaly hüjümçisi Hwiça Kwarasheliýadyr. La Gazzetta dello Sport-uň habaryna görä, klubuň wekilleri mümkin bolup biljek transferi maslahatlaşmak üçin 23 ýaşly oýunçy bilen habarlaşdylar.
Futbolçynyň “Napoli” kluby bilen baglaşan şertnamasy 2027-nji ýyla çenli dowam edýär we Transfermarkt portalynda oýunçynyň bazar bahasy 80 million ýewro deňdir.
Çep tarapky goragçy ornuny güýçlendirmek üçin “Barselona”, esasan, ýaş oýunçylary göz öňünde tutýar: “Bawariýadan” 24 ýaşly Alfonso Dewis, “Benfikadan” 21 ýaşly Alwaro Karreras we “Feýenoorda” degişli, ýöne “Wulwerhempton” üçin oýnaýan 22 ýaşly Ugo Bueno.
Sport.es Dewis bilen gepleşikleriň kyn bolup biljekdigini belleýär. Munuň sebäbi, oýunçynyň Madridiň “Realyna” geçmek islegi we ýokary aýlyk talaplarydyr.
“Barselona” häzirki wagtda 33 utuk bilen Ispaniýa çempionatynda birinji ýerde durýar. “Real” ikinji ýerde (27 oçko), Madridiň “Atletikosy” bolsa üçünji ýerde durýar (26 oçko).
