2024-nji ýylyň Buker baýragy “Orbita” romany üçin iňlis ýazyjysy Samanta Harwä berildi. Kitapda Halkara kosmos stansiýasyndaky (HKS) alty astronawtyň durmuşyndan bir gün beýan edilýär diýip, BBC habar berýär.
Dabara Londonda geçirildi. Şu ýyl emin agzalarynyň başlygy britaniýaly ýazyjy we hudožnik Edmund de Waal boldy. Onuň aýtmagyna görä, emin agzalary bu baýragy Harwä bermek çözgüdini biragyzdan goldady.
“Käwagt siz bir kitaba duş gelýärsiňiz we bu täsin wakanyň nähili bolup geçendigine düşünip bileňzok. Emin hökmünde biz tolgundyryjy, gysby we täsirli bolan, paýlaşmak islegini döredýän kitaby tapmaga töwekgeldik” – diýip, de Waal aýtdy.
Harwi 2019-njy ýyldan bäri baýraga mynasyp bolan ilkinji aýal, onuň “Orbita” romany bolsa Beýik Britaniýada gysga sanawdan iň köp satylan kitap hem-de wakalary kosmosda bolup geçýän ilkinji ýeňiji kitap boldy. Şeýle-de, bu baýragyň taryhynda iň gysga romandyr – kitap bary-ýogy 136 sahypadan ybarat.
“Bu ykjam, ýöne şol bir wagtyň özünde mazmun taýdan ajaýyp roman bizi Ýeriň gözelligine syn etmäge we bir wagtyň özünde her bir adam ömrüniň şahsy we toparlaýyn gymmatlygy barada oýlanmaga çagyrýar” – diýlip, baýragyň beýanynda aýdylýar.
Samanta Harwiden başga-da, şu ýyl baýrak ugrunda amerikaly ýazyjy Reýçel Kuşner (“Creation Lake”), niderlandly-ysraýylly ýazyjy Ýael wan der Wuden (“The Safekeep”), kanadaly ýazyjy Enn Maýkls (“Held”), awstraliýaly Şarlott Wud (“Stone Yard Devotional”), amerikaly ýazyjy Persiwalýa Eweretta (“James”) göreşdi.
Gysga sanawdaky awtorlaryň her biri 2500 funt sterling, ýeňiji bolsa 50 müň funt sterling aldy.
Geçen ýyl baýraga “Pygamberiň aýdymy” (“Prophet Song”) romany üçin irlandiýaly Pol Linç mynasyp boldy.
