Ispaniýa çempionatynyň 13-nji tapgyrynda Madridiň "Realy" "Osasuna" bilen duşuşdy. "Real" bir oýunda şikes ýetmeler sebäpli toparyň esasy düzüminden üç sany öňdebaryjy oýunçysyny ýitirdi. Muňa garamazdan, ol 4:0 hasabynda ýeňiş gazandy.
20-nji minutda "Realyň" gapdal hüjümçisi Rodrigo Goes şikes alyp, meýdançadan çykmaly boldy. Rodrigo öňem oktýabryň ahyrynda myşsa şikesini alypdy, şonuň üçin-de ol birnäçe oýny sypdyrmaly boldy.
Şenbe güni bolan duşuşygyň birinji ýarymy "Reala" ýene bir oýunçyny çalşyrmaly etdi. Duşuşygyň 30-njy minudynda goragçy Eder Militao sag dyzyndan agyr şikes aldy. Asly braziliýaly goragçy haçanda top burçdan oýna girizilen wagty garşydaşy bilen ýokary böküp, ýere düşende sag dyzynyň bognuna zeper ýetirdi. "Realyň" resmi web sahypasynda berlen beýanatda: "Militao ýakyn günlerde operasiýa ediler" diýlip bellenilýär. Oýunçy karýerasynda ikinji gezek şuňa meňzeş şikes aldy. Ol 2023-nji ýylyň awgustynda çep dyzyna zeper ýetmesi sebäpli ýedi aýlap oýundan çykdy. Şu möwsümiň ähli ýaryşlarynda Militiao klub üçin 16 oýun oýnady, şol oýunlarynda ol bir gezek netijeli pas berdi we bir goly garşydaşynyň derwezesine geçirdi.
Şeýle-de Madrid klubunyň ispaniýaly goragçysy Lukas Waskes oýnuň ikinji ýarymynda meýdança çykyp bilmedi. Duşuşykda onuň hem myşsasyna zeper ýetendigi habar berilýär.
