Smartfonlaryň çydamlylygy boýunça ýowuz synaglary geçirmek bilen tanalýan ýutub blogeri JerryRigEverything bu gezek köpçülikleýin öndürilen üç ekranly Huawei Mate XT-ni, ýagny bu kompaniýanyň ilkinji eplenýän smartfonyny synag etdi. Synagyň netijeleri hemmäni lapykeç etdi diýip, rozetked.me habar berýär.
Smartfon gyrdalama synagyndan geçmedi: blogger ekrany adaty dyrnaklar bilen zaýalady. Şeýle-de bolsa, JerryRigEverything-iň pikiriçe, bu potensial alyjylary gorkuzmaly däldir, sebäbi bu ýagdaý eplenýän smartfonlar üçin adatydyr.
Şol bir wagtyň özünde, ekrana demir jisim bilen zeper ýetirmek has aňsat boldy - üçünji gezek urlandan soň, ekranda işlemeýän pikselli bir nokat peýda boldy. Ol el degdigiçe ulaldy.
Smartfonyň "eplenýän" bölegi hem synaglaryny geçip başarmady. Gum we ownuk bölejikler mehanizme girenlerinde, ol eplenmegini bes etdi.
Mundan başga-da, blogçy Mate XT-ni köp tagalla etmän, ters tarapyna epläp bildi. Emma Huawei şeýle ýagdaýlary göz öňünde tutdy. Ol Mate XT-ni nädogry eplemäge synanyşanyňyzda, enjam nädip “dogry” eplemelidigini görkezýär, derrew ekranda animasiýa peýda bolýar.
Bu barada JerryRigEverything: "Bu [tersine] synag wagtynda rehimdarlyk soraýan ilkinji smartfon boldy" diýip belleýär.
Netijede, blogçy goşmaça gurallary ulanman, smartfonyň yzky panellerini el bilen, goşmaça güýç sarp etmän aýryp bildi. Onuň içinden her bir ekran üçin üç sany inçe batareýa tapyldy.
Mundan ozal Huawei Mate XT smartfonynyň abatlaýyş işleriniň resmi bahalaryny yglan edipdi. Onda: ekrany çalyşmak smartfon eýelerine 8000 ýuana (takmynan 1120 dollar), içki esasy platany çalyşmak bolsa 9,100 ýuana (1275 dollar) düşer diýlip aýdylýar.
