Portugaliýaly hünärmen, Lissabonyň “Sportinginiň” baş tälimçisi Ruben Amorim Angliýanyň “Mançester Ýunaýted” klubuna ýolbaşçy bolar. Bu barada Record habarlar çeşmesiniň žurnalistleri habar berýär.
Maglumatlara görä, MÝ “Sportinge” tälimçi üçin öwezini dolma hökmünde 10 mln ýewro tölemäge razy boldy. 39 ýaşly hünärmeniň şertnamasynda hut şu mukdar görkezilen.
talkSPORT neşiri portugaliýalynyň zähmet hakynyň “gyzyl şeýtanlaryň” klubunda üç esse ýokarlanjakdygyny ýazýar. Insaýder Fabrisio Romanonyň maglumatlaryna görä, MÝ eýýäm tälimçilik ştaby barada Amorim bilen gepleşikleri geçirýär.
“Mançester Ýunaýtedde” Amorim işden çykarylan niderlandly Erik ten Hagyň ornuny eýelär. Ol gidenden soň, topara wagtlaýyn Rud wan Nistelroý ýolbaşçy boldy. Ten Hagyň ştabynda ol hüjümçileriň tälimçisidi.
Ten Hag “Mançester Ýunaýtede” 2022-nji ýyldan bäri ýolbaşçylyk etdi. Häzirki möwsümde topar Angliýanyň Premýer-ligasynyň (APL) ýaryş jedwelinde 14-nji orny eýeleýär. Ol dokuz oýunda bary-ýogy üç ýeňiş gazandy, Ýewropa ligasynda bolsa ähli üç oýun deňme-deň tamamlandy.
Amorim “Sportinge” 2020-nji ýyldan bäri tälim berýär. Topar bilen Portugaliýanyň iki çempionatyny (2020/21, 2023/24), iki Portugaliýa ligasynyň Kubogyny (2020/21, 2021/22), Portugaliýanyň Superkubogyny (2021) utdy.
