Karlos Saýns Meksikanyň Gran-prisinde ýeňiji boldy, Hemilton – 4-nji, Werstappen – 6-njy

Doganlar Rodriges adyndaky awtodromda “Formula-1” çempionatynyň Meksikanyň Gran-prisi tapgyry tamamlandy. Onuň ýeňijisi “Ferrariden” Karlos Saýns boldy. Ikinji bolup pellehana “Maklareniň” ýaryşa gatnaşyjysy Lando Norris geldi. Liderleriň üçlügini “Ferrariniň” ýene bir sürüjisi Şarl Lekler jemledi.

“Red Bulldan” çempionatyň lideri Maks Werstappen ýaryşyň dowamynda Lando Norris bilen nädogry göreş alyp barandygy üçin iki sany 10 sekuntlyk jerime aldy. Ilki niderlandly ýaryşa gatnaşyjy Norrisi ýoldan gysyp çykarandygy üçin, soňra ýoluň çäginden çykyp, artykmaçlyk gazanandygy üçin jerime aldy. Netijede, Werstappen altynjy orny eýeledi. Onuň topardaşy meksikaly Serhio Peres “Formula-1-iň” öý tapgyrynda 17-nji boldy.
Meksikanyň Gran-prisiniň jemi boýunça ilkinji onluk şeýle:

1. Karlos Saýns (“Ferrari”) – 71 aýlaw.
2. Lando Norris (“Maklaren”) +4.705.
3. Şarl Lekler (“Ferrari”) +34.387.
4. Lýuis Hemilton (“Mersedes”) +44.780.
5. Jorj Rassell (“Mersedes”) +48.536.
6. Maks Werstappen (“Red Bull”) +59.558.
7. Kewin Magnussen (“Haas”) +1:03.642.
8. Oskar Piastri (“Maklaren”) +1:04.928.
9. Niko Hýulkenberg (“Haas”) +1 aýlaw.
10. Pýer Gasli (“Alpin”) +1 aýlaw.