Uilliam Şekspiriň kitaby bir asyrdan soň Patersonyň mugt jemgyýetçilik kitaphanasyna (Nýu-Jersi, ABŞ) gaýtarylyp berildi. Ýerli ýaşaýjy Sintiýa Deleý merhum enesiniň goş-golamlarynyň arasyndan “Genrih V” pýesasynyň seýrek neşirini tapdy. Onda göçürmäniň 1923-nji ýylda kitaphanadan alnandygyny görkezilipdir diýip, UPI ýazýar.
Sintiýa kitaphananyň işgärleri bilen habarlaşyp, kitaby yzyna gaýtarmakçydygyny aýtdy.
“Yzyna berilmeli möhleti geçen kitaplary kitaphana gaýtarmak üçin hiç wagt giç däl. Emma şunuň ýaly ýagdaýa soňky 20 ýylda ilkinji gezek duş geldim" - diýip, kitaphananyň müdiri Kori Fleming aýdýar.
Neşiriň 1910-njy ýylda çäkli neşirde çap edilendigi we kolleksionerler üçin möhüm ähmiýete eýedigi bellendi.
Şol bir wagtyň özünde, kitap kitaphananyň yzyna berilmeli möhleti geçen kitaplary boýunça rekord goýmakdan uzakda. Şeýle rekordy Bremeniň arhiýepiskopy hakda nemes dilinde ýazylan neşir saklaýar. Ginnesiň rekordlar kitabynyň maglumatlaryna görä, şol kitap 1609-njy ýylda neşir edilipdir. Iňlis polkownigi Robert Uolpol ony 1667–1668-nji ýyllarda Kembrijdäki kitaphanadan alypdyr. Neşir 288 ýyldan soň yzyna gaýtaryldy. Professor Jon Plamb ony markiz Çamliniň Norfolkdaky hususy kitaphanasyndan tapdy.
