Bütindünýä saglygy goraýyş guramasy (BSGG) Müsüre gyzzyrmadan azat ýurt hökmünde şahadatnama berdi. Bu barada BSGG-niň Ženewadaky ştab-kwartirasy habar berdi diýip, TASS belleýär.
“Gyzzyrma Müsür siwilizasiýasy ýaly gadymydyr, ýöne faraonlara ejir çekdiren bu kesel indi onuň geljegine däl-de, taryhyna degişlidir” – diýip, BSGG-niň baş müdiri Tedros Adhanom Gebreýesus belledi.
“Müsüri gyzzyrma keselinden azat ýurt hökmünde ykrar edýän bu şahadatnama, hakykatdanam, taryhy waka we halkyň hem hökümetiň bu gadymy betbagtlykdan gutulmaga meýilliliginiň subutnamasydyr. Müsüri sebitiň beýleki ýurtlaryny ruhlandyrýan we dogry çeşmeler hem dogry gurallar bolan ýagdaýynda nämäni gazanyp boljakdygyny görkezýän bu üstünligi bilen gutlaýaryn” – diýip, Gebreýesus belläp geçdi.
Müsür Birleşen Arap Emirliklerinden we Marokkodan soň BSGG-niň Gündogar Ortaýer deňzi sebitinde “gyzzyrmadan azatlygyň” şahadatnamasyny alan üçünji we 2010-njy ýyldan bäri ilkinji ýurt boldy. “Bütin dünýäde jemi 44 ýurt we 1 sebit bu sepgide ýetdi” – diýip, BSGG belledi.
Gyzzyrmanyň ýokdugyny tassyklaýan şahadatnama, eger döwlet gyzzyrmanyň Anopheles çybynlarynyň üsti bilen ýaýramagynyň azyndan üç ýyl bäri özüniň bütin çäginde kesilendigini subut edip bilse berilýär. Şeýle-de, ýurt ýokanjyň ýaňadan geçip başlamagynyň öňüni alyp bilmek başarnygyny görkezmeli.
Gyzzyrma adamyň iň giňden ýaýran ýokanç keselleriniň biridir. Ony dörediji hökmünde Plasmodium toparyndan bir öýjükli jandarlar çykyş edýär. BSGG-niň häzirki hasaplamalaryna görä, dünýäde gyzzyrma keseliniň ähli görnüşlerini göterijileriň sany 220 milliona golaý. Kesellänleriň aglabasy Afrikanyň çäklerinde we Günorta Aziýanyň ösýän ýurtlarynda ýaşaýar.
