Türkmenistandan alpinistrler topary belentligi boýunça dünýäde sekizinji orunda durýan Gimalaý daglarynyň «Manaslu» depesine (8163 m) çykyp, Türkmenistanyň Döwlet baýdagyny parlatdylar. Bu barada "Türkmenistan: Altyn asyr" elektron neşiri habar berýär.
Bellenilişi ýaly, bu dag depesine çykyşlygy «Morinžgeologiýa» hyzmat kärhanalar toparynyň dolandyryş toparynyň başlygynyň orunbasary Arno Ter-Sankowyň ýolbaşçylygynda Nepal tarapy ýola goýdy. Topara Latwiýanyň, Russiýanyň we beýleki ýurtlaryň raýatlary gatnaşdy. Daga çykmaga gatnaşanlaryň hemmesi-de ozal Ewerest (8848 m), K2 (8611 m), Akonkagua (6962 m), Ama-Dablam (6814 m), Kilimanjaro (5895 m), Ararat (5165 m), Monblan (4810 m) we Matterhorn (4478 m) ) ýaly ady belli dag depelerine çykan tejribeli alpinistlerdir. Bu depeleriň ählisinde-de Türkmenistanyň Döwlet baýdagy galdyrylypdy.
«Dragon Oil» ýaly halkara kompaniýalar bilen bilelikde alnyp barylýan taslamalaryň çäginde «Morinžgeologiýa» «Jeýtun» we «Jygalybeg» ýataklarynda geologik gözlegleri geçirýär. Bu maglumatlar Türkmenistanyň deňizdäki nebit-gaz baýlyklarynyň üstünlikli özleşdirilmegine goşant goşýar. Maglumatlar meýdan gözlegleriniň dowamynda elektron görnüşinde ýazylýar, ýöne koordinatlary ýokary takyklykda kesgitlemek üçin differensial GPS hemra ulgamy ulanylýar. Ýygnalan maglumatlar ygtyýarnama alan geologik maglumat we awtomatik taslama programma üpjünçiligi önümleri bilen işlenip teswirlenýär.
