ABŞ-nyň Missuri ştatynyň Kanzas-Siti şäherinde 1924-nji ýylda gömülip goýlan wagt kapsulasy açyldy. Ol Birinji jahan urşy we XX asyryň başyndaky durmuş barada resminamalary, artefaktlary saklapdyr diýip, CNN habar berýär.
Wagt kapsulasy 1924-nji ýylda Birinji jahan urşuna gatnaşyjylara bagyşlanan Azatlyk ýadygärligini gurmak taslamasynyň çäklerinde döredildi. Ol Milli muzeýiň taryhçylary we kuratorlar topary tarapyndan döredildi. Kapsulany goýmak dabarasyna Kanzas-Sitiniň köp sanly belli ýaşaýjylary gatnaşdy, çäräniň özi bolsa 100 müňe golaý adamy özüne çekdi.
Kapsulany açmak aňsat düşmedi, çünki ol hek daşy bilen betonyň aralygynda ýerleşýärdi. Ony almak üçin Azatlyk ýadygärlik diňiniň diwaryny burawlamaly boldy. Kapsula açylandan soň, onuň içinde gazetler, ABŞ-nyň Konstitusiýasynyň göçürme nusgasy, Injil we Birinji jahan urşy bilen baglanyşykly resminamalar tapyldy. Artefaktlaryň arasynda tohumly çüýşe, soýuzdaş goşun serkerdeleriniň hatlary we 1921-nji ýyldaky Kansas City Star gazetiniň çap nusgasy aýratyn ünsi çekdi.
Şeýle-de, kapsulanyň mis daşynda birnäçe gol oýulyp çekilipdir. Muzeýiň hünärmenleri gol çekenleriň şahsyýetini takyk kesgitläp bilmediler, ýöne munuň kapsulany goýmaga gatnaşan işçilerdigi baradaky netijä geldiler.
