Robot-gumanoid tarapyndan döredilen surat ilkinji gezek Sotheby’s auksion öýi tarapyndan satuwa çykarylar. Bu barada auksionyň saýtyndaky habarda aýdylýar.
Maglumatlara görä, “Emeli aňyň Hudaýy” atly surat 31-nji oktýabrda satuwa goýlar. Bu suratda belli iňlis matematigi Alan Týuringiň (1912-1954) portreti şekillendirilen.
AFP agentliginiň maglumatlaryna görä, Londonda görkeziljek iki metrlik suratyň bahasy 130 müň dollardan 196 müň dollar aralygynda bolup biler. Onuň awtory robot-suratkeş Ai-Da boldy. Robot zenan görnüşde döredilip, taryhda ilkinji programmist Ada Lawleýsiň hormatyna şeýle atlandyryldy.
Ai-Da emeli aň algoritmleriniň esasynda işleýär, onda gözüň deregine kamera, elleriň deregine bolsa bioniki protezler bar. Roboty dörediji Eýdan Milleriň aýtmagyna görä, Týuring eýýäm 1950-nji ýyllarda EA tehnologiýalarynyň ulanylmagy babatynda howatyrlanypdyr.
