Mýunheniň “Bawariýasy” klub logotipini täzeledi, has dogrusy, oňa sähel üýtgeşme girizdi. Bu barada nemes klubunyň metbugat gullugy habar berýär.
Ýakynda “Bawariýanyň” sosial ulgamlardaky sahypasynda täzelenen logotip awatar hökmünde peýda boldy. Öňki logotip bilen deňeşdirilende, dizaýn şol bolşuna galdy, ýöne gyzyl we gök reňkler has ýiti boldy.
“Bawariýa” Rotterdamyň “Feýenoordynyň” göreldesine eýerdi diýsek hem bolar. Çünki, “Feýenoord” hem öz nyşanyna sähel üýtgeşme girizipdi – diňe harplaryň şrifti üýtgedi, reňkler has ýiti boldy hem-de logotipde gyzyl bilen ak reňkiň arasyny bölýän çyzyk aýryldy.
Alty oýundan soň Mýunheniň “Bawariýasy” 2024/2025 möwsüminde Bundesliganyň ýaryş jedwelinde birinji orny eýeleýär. Onuň hasabynda 14 utuk bar. Indiki tapgyrda Wensan Kompaniniň topary “Ştutgart” bilen duşuşar. Oýun 19-njy oktýabrda Aşgabat wagty bilen 21:30-da Mýunhen klubunyň öý stadiony bolan “Alýans Arenada” geçiriler.
