Professional Fighters League (PFL) guramasy Super Fight seriýasyna girýän söweşleriň ýeňijilerine beriljek täze çempionlyk guşagyny hödürledi.
Guşagyň esasy plastinasynda PFL söweşleriniň geçýän kletkasynyň formasyna laýyk gelýän onburçlugyň şekili bar. Gapdallarynda her agram derejesini görkezýän plastina ýerleşdirilen. Ähli plastinalar altyndan ýasalyp, olaryň umumy agramy 12,5 funta (5,66 kg) barabar.
Şeýle çempionlyk guşaklarynyň ilkinji eýeleri eýýäm şu hepde belli bolar: 19-njy oktýabrda Saud Arabystanynyň paýtagty Er-Riýadda “Titanlaryň söweşi” (Battle of the Giants) ýaryşy geçirilip, onuň çäklerinde superçempion tituly ugrunda UFC-niň öňki çempiony Frensis Ngannu bilen 2023-nji ýylda agyr agramly söweşijileriň Gran-prisiniň we PFL/Bellator çempionlaryny birleşdiriji söweşiň ýeňijisi Renan Ferreýra söweşer.
Agşamyň ýene bir esasy wakasy ýarym ýeňil agramyň güýçli zenan wekilleri Kris Saýborg bilen Larissa Paçekonyň arasyndaky söweş bolar.
PFL Super Fights ýaryşy Aşgabat wagty bilen 22:30-da başlar. Esasy söweşleriň başlanmagy 01:00-a meýilleşdirilýär. Söweşler DAZN we ESPN+ onlaýn platformalarynda göni ýaýlymda elýeterli bolar.
